Zara Adams, myslimania e parë në 007?

Zara Adams ka deklaruar se dëshiron të jetë e dashura në film e James Bondit, e para me prejardhje myslimane. Ajo është paraqitur në një audicion, nëpërmjet të cilit do të përzgjidhet aktorja që do ta luajë vazhdimin e serisë së njohur me agjentin 007. Titulli i filmit do të jetë "Quantum of Solace". Në një intervistë për tabloidin britanik "The Sun", Adams ka deklaruar se producentëve u kanë pëlqyer fotot e saj, ndaj e kanë ftuar në audicion. "Puna me emra të mëdhenj si Marc Foster dhe Daniel Craig për mua është përvojë e mirë. Roli i myslimanes nga Azia në filmin e James Bondit do të më hapte dyert në karrierë, por edhe do të rrënonte barrierat", është shprehur Zara.
Ajo ka thënë se është e vetëdijshme që prindërve të saj një gjë e tillë nuk do t`u pëlqejë. "Jam rritur në një ambient tipik islam dhe filmi i parë, të cilin e kam parë është kur kam nisur fakultetin në Edinburgh. Besoni ose jo, ky ishte filmi i Bondit", ka sqaruar Zara. Ajo është e lindur në Glasgow, babi saj është nga Irani, kurse e ëma nga Pakistani.